തമിഴ്നാട്ടിലെ കാർഷിക, കുടിവെള്ള ആവശ്യങ്ങൾക്കായി മുള്ളപ്പെരിയാർ അണക്കെട്ടിന്റെ ഷട്ടറുകൾ ഇന്ന് തുറക്കും. സെക്കൻഡിൽ 200 ഘനയടി വീതം 120 ദിവസത്തേക്കാണ് വെള്ളം തുറന്നുവിടുന്നത്. തമിഴ്നാട് സർക്കാരാണ് ഇതുസംബന്ധിച്ച് ഉത്തരവിറക്കിയത്.
തേനി ജില്ലയിലെ കമ്പം താഴ്വരയിലുള്ള 14,707 ഏക്കർ സ്ഥലത്തെ ഒന്നാം ഘട്ട നെൽകൃഷിക്കായാണ് പ്രധാനമായും ജലം ലഭ്യമാക്കുന്നത്. ഇതോടൊപ്പം മധുര കോർപ്പറേഷൻ പ്രദേശത്തെ കുടിവെള്ള ആവശ്യത്തിനായി സെക്കൻഡിൽ 150 ഘനയടി വെള്ളവും തുറന്നുവിടും.
സാധാരണയായി ജൂൺ മാസം ഒന്നാം തീയതിയാണ് കാർഷിക ആവശ്യങ്ങൾക്കായി അണക്കെട്ടിൽ നിന്ന് വെള്ളമെടുക്കുന്നത്. എന്നാൽ ഇത്തവണ മഴക്കുറവ് മൂലമാണ് ഷട്ടർ തുറക്കുന്നത് വൈകിയതെന്ന് തമിഴ്നാട് അധികൃതർ വ്യക്തമാക്കുന്നു.
