പശ്ചിമ ബംഗാൾ നിയമസഭാ തിരഞ്ഞെടുപ്പിന്റെ രണ്ടാം ഘട്ട പരസ്യപ്രചാരണം ഇന്ന് സമാപിക്കും. വോട്ടർമാരെ അവസാന വട്ടവും കയ്യിലെടുക്കാനുള്ള കടുത്ത പോരാട്ടത്തിലാണ് തൃണമൂൽ കോൺഗ്രസും ബിജെപിയും. തൃണമൂൽ കോൺഗ്രസിനായി മുഖ്യമന്ത്രി മമത ബാനർജി പ്രചാരണത്തിന് നേതൃത്വം നൽകുമ്പോൾ, ബിജെപിക്കായി പ്രധാനമന്ത്രി നരേന്ദ്ര മോദി, കേന്ദ്ര ആഭ്യന്തര മന്ത്രി അമിത് ഷാ തുടങ്ങിയ പ്രമുഖ നേതാക്കൾ രംഗത്തുണ്ട്.
ആദ്യ ഘട്ടത്തിൽ 94 ശതമാനത്തോളം റെക്കോർഡ് പോളിംഗ് നടന്ന ബംഗാളിൽ രണ്ടാം ഘട്ടത്തിലും സമാനമായ ആവേശം ഉണ്ടാകുമെന്നാണ് പാർട്ടികളുടെ പ്രതീക്ഷ. എന്നാൽ ചിലയിടങ്ങളിൽ റിപ്പോർട്ട് ചെയ്യപ്പെട്ട അക്രമസംഭവങ്ങൾ തിരഞ്ഞെടുപ്പ് കമ്മീഷനെ ആശങ്കയിലാക്കുന്നുണ്ട്. ഒരു കോൺഗ്രസ് പ്രവർത്തകൻ കൊല്ലപ്പെട്ടതടക്കമുള്ള സംഘർഷങ്ങൾ ഉണ്ടായ പശ്ചാത്തലത്തിൽ സുരക്ഷാ ക്രമീകരണങ്ങൾ ശക്തമാക്കിയിട്ടുണ്ട്.
ഏപ്രിൽ 29-നാണ് ബംഗാളിൽ രണ്ടാം ഘട്ട വോട്ടെടുപ്പ് നടക്കുന്നത്. മെയ് നാലിന് വോട്ടെണ്ണൽ നടക്കും. അധികാരം നിലനിർത്താൻ മമത ബാനർജിയും, ബംഗാളിൽ ചരിത്രപരമായ വിജയം ലക്ഷ്യമിട്ട് ബിജെപിയും അവസാന നിമിഷവും സജീവമാണ്. കോൺഗ്രസും ഇടതുപക്ഷവും തങ്ങളുടെ സ്വാധീനം തിരിച്ചുപിടിക്കാനുള്ള ശ്രമങ്ങളും നടത്തുന്നുണ്ട്. മെയ് നാലിന് പുറത്തുവരുന്ന ഫലം ബംഗാളിന്റെ രാഷ്ട്രീയ ഭാവി തീരുമാനിക്കുന്നതിൽ നിർണ്ണായകമാകും.
