പശ്ചിമേഷ്യയിലെ സംഘർഷങ്ങളെത്തുടർന്ന് വിമാന സർവീസുകൾ കൂട്ടത്തോടെ റദ്ദാക്കിയതോടെ കോഴിക്കോട് ഡിസിസി പ്രസിഡന്റ് കെ. പ്രവീൺ കുമാർ ബഹ്റൈനിൽ കുടുങ്ങി. ഒഐസിസിയുടെ (OICC) നോമ്പ് തുറ പരിപാടിയിൽ പങ്കെടുക്കുന്നതിനായി കെപിസിസി പ്രസിഡന്റിനൊപ്പമാണ് അദ്ദേഹം ബഹ്‌റൈനിലെത്തിയത്. പരിപാടിക്ക് ശേഷം കെപിസിസി പ്രസിഡന്റ് മടങ്ങിയെങ്കിലും, പ്രവീൺ കുമാർ നാട്ടിലേക്ക് മടങ്ങാനായി വിമാനത്താവളത്തിലേക്ക് പോകവെ വിമാന സർവീസുകൾ അപ്രതീക്ഷിതമായി തടസ്സപ്പെടുകയായിരുന്നു.
നിലവിൽ ബഹ്‌റൈനിലുള്ള സഹോദരിയുടെ വീട്ടിലാണ് പ്രവീൺ കുമാർ കഴിയുന്നത്. വിമാന സർവീസുകൾ പുനരാരംഭിക്കാത്തതാണ് നിലവിൽ നാട്ടിലേക്ക് മടങ്ങുന്നതിന് നേരിടുന്ന പ്രധാന തടസ്സമെന്ന് അദ്ദേഹം വ്യക്തമാക്കി. സർവീസുകൾ ഉടൻ പുനരാരംഭിക്കാൻ സാധ്യതയുണ്ടെന്ന് എംബസി അധികൃതർ അറിയിച്ചതായും അദ്ദേഹം പറഞ്ഞു.
ബഹ്റൈനിൽ നിലവിൽ ഭയാനകമായ സാഹചര്യങ്ങളില്ലെന്നും ജനജീവിതം സാധാരണ നിലയിലാണെന്നും പ്രവീൺ കുമാർ അറിയിച്ചു. കടകമ്പോളങ്ങൾ തുറന്നു പ്രവർത്തിക്കുന്നുണ്ട്, വാഹന ഗതാഗതം സാധാരണ പോലെയാണ്. എങ്കിലും മേഖലയിലെ യുദ്ധസമാനമായ അന്തരീക്ഷം പ്രവാസികൾക്കിടയിൽ ചെറിയ തോതിൽ ആശങ്കയും പരിഭ്രാന്തിയും സൃഷ്ടിക്കുന്നുണ്ടെന്ന് അദ്ദേഹം കൂട്ടിച്ചേർത്തു.
ആക്രമണങ്ങൾ തുടരുന്ന സാഹചര്യത്തിൽ ജനവാസ മേഖലകളെ ഇത് കാര്യമായി ബാധിച്ചിട്ടില്ലെങ്കിലും അതീവ ജാഗ്രത പാലിക്കണമെന്ന് അധികൃതർ നിർദ്ദേശിച്ചിട്ടുണ്ട്. വരും ദിവസങ്ങളിലും സംഘർഷം തുടരാൻ സാധ്യതയുള്ളതിനാൽ ഭരണകൂടം നൽകുന്ന കൃത്യമായ സുരക്ഷാ നിർദ്ദേശങ്ങൾ പാലിക്കാൻ പ്രവാസികളടക്കമുള്ളവർ ശ്രദ്ധിക്കണമെന്ന് ഔദ്യോഗിക വൃത്തങ്ങൾ അറിയിച്ചു. വിമാന സർവീസുകൾ പുനരാരംഭിക്കുന്നതിനായി കാത്തിരിക്കുകയാണ് താനെന്ന് പ്രവീൺ കുമാർ വ്യക്തമാക്കി.
