പൊലീസിനെയും ആഭ്യന്തര വകുപ്പിനെയും സാമൂഹിക മാധ്യമങ്ങളിലൂടെ നിരന്തരം വെല്ലുവിളിച്ച് ദിവസങ്ങളോളം ഒളിവിൽ കഴിഞ്ഞ ക്രിമിനൽ കേസ് പ്രതി അർജുൻ ആയങ്കി ഒടുവിൽ പൊലീസ് പിടിയിലായി. കണ്ണൂർ നഗരത്തിലെ അഭിഭാഷക ദമ്പതികളുടെ വീട്ടിലെത്തിയ അർജുൻ ആയങ്കിയെ പുലർച്ചെയോടെ കണ്ണൂർ ടൗൺ പൊലീസ് സംഘം വളഞ്ഞ് ഓടിച്ചിട്ട് പിടികൂടുകയായിരുന്നു.
തളിപ്പറമ്പിൽനിന്ന് കണ്ണൂർ നഗരത്തിലേക്ക് ഓട്ടോറിക്ഷയിൽ അഭിഭാഷകന്റെ വീട്ടിലേക്ക് എത്തിയ അർജുൻ ആയങ്കിയെക്കുറിച്ച് ഡ്രൈവർക്ക് തോന്നിയ സംശയമാണ് നിർണായകമായത്. ഡ്രൈവർ വിവരമറിയിച്ചതിനെ തുടർന്ന് ഡി.ഐ.ജി/ഡിവൈ.എസ്.പി തലത്തിലുള്ള ഉയർന്ന പൊലീസ് സംഘം സ്ഥലം വളഞ്ഞു. പൊലീസിനെ കണ്ട് ഓടി രക്ഷപ്പെടാൻ ശ്രമിച്ച അർജുനെ പിന്തുടർന്ന് കീഴടക്കുകയായിരുന്നു.
തൃശൂർ, മലപ്പുറം, കോഴിക്കോട്, പാലക്കാട് തുടങ്ങി വിവിധ ജില്ലകളിലും അതിർത്തി പ്രദേശങ്ങളിലും മാറിമാറിയാണ് അർജുൻ ഒളിവിൽ കഴിഞ്ഞിരുന്നത്. അർജുനെ ഒളിവിൽ കഴിയാനും യാത്ര ചെയ്യാനും സഹായിച്ച അഞ്ചോളം സുഹൃത്തുക്കളെ പൊലീസ് അറസ്റ്റ് ചെയ്തു. വളപട്ടണത്തുനിന്ന് കണ്ണൂരിലേക്ക് എത്തുന്നതിനായി ഇയാൾ ഉപയോഗിച്ച കാറും ഇതിനോടകം പൊലീസ് പിടിച്ചെടുത്തിട്ടുണ്ട്. മുൻപ് സഹോദരൻ അഖിലിനെയും തൃശൂരിൽ നിന്ന് പൊലീസ് പിടികൂടിയിരുന്നു.
ഒളിവിലിരിക്കുമ്പോൾ സോഷ്യൽ മീഡിയയിലൂടെ പൊലീസിനെ പരിഹസിച്ച അർജുൻ, അറസ്റ്റിലായി കൈവിലങ്ങണിഞ്ഞ് നടന്നു നീങ്ങുമ്പോഴും മാധ്യമങ്ങളോട് സമാനമായ രീതിയിൽ പരിഹാസം തുടർന്നു. "കടലിൽ കാണാതായ മത്സ്യത്തൊഴിലാളികളെ കിട്ടിയോ?" എന്നായിരുന്നു ഇയാളുടെ പരിഹാസ ചോദ്യം.
കൊതമംഗലം സി.ഐയെ ഭീഷണിപ്പെടുത്തിയത്, കണ്ണൂർ സൈബർ പൊലീസിൽ ഡി.സി.സി പ്രസിഡന്റ് നൽകിയ പരാതി തുടങ്ങി നിലവിൽ 23-ലധികം കേസുകൾ അർജുൻ ആയങ്കിക്കെതിരെയുണ്ട്. തുടർനടപടികൾക്കായി ഇയാളെ എറണാകുളത്തേക്ക് കൊണ്ടുപോകുമെന്നും കൂടുതൽ വകുപ്പുകൾ ചുമത്തുമെന്നും പൊലീസ് അറിയിച്ചു.
