പാലാ നഗരസഭ ചെയർപേഴ്സണായി കോൺഗ്രസ് വിമത അംഗം മായാ രാഹുൽ തിരഞ്ഞെടുക്കപ്പെട്ടു. എൽ.ഡി.എഫിന്റെയും വിമത കോൺഗ്രസ് അംഗങ്ങളുടെയും പിന്തുണയോടെയാണ് മായാ രാഹുൽ അധ്യക്ഷ പദവിയിലെത്തിയത്. യു.ഡി.എഫിന് ഭരണം നഷ്ടമായതിന് പിന്നാലെ നടന്ന തിരഞ്ഞെടുപ്പിൽ അവർക്ക് കനത്ത തിരിച്ചടിയാണ് നേരിട്ടത്.
ആകെ 26 അംഗങ്ങളുള്ള നഗരസഭയിൽ 16 വോട്ടുകൾ നേടിയാണ് മായാ രാഹുൽ വിജയിച്ചത്. കേരള കോൺഗ്രസിലെ (എം) 10 അംഗങ്ങളും, സി.പി.എമ്മിലെ 2 അംഗങ്ങളും, 4 കോൺഗ്രസ് വിമത അംഗങ്ങളുമാണ് മായാ രാഹുലിനെ പിന്തുണച്ച് വോട്ട് രേഖപ്പെടുത്തിയത്.
യു.ഡി.എഫ് സ്ഥാനാർത്ഥിയായി മത്സരിച്ച റിയാ ചിരാൻകുഴിക്ക് 10 വോട്ടുകളാണ് ലഭിച്ചത്. മുൻപ് യു.ഡി.എഫ് ഭരണസമിതിക്കെതിരെ എൽ.ഡി.എഫ് കൊണ്ടുവന്ന അവിശ്വാസപ്രമേയം വിജയിച്ചതിനെ തുടർന്നാണ് നഗരസഭയിൽ പുതിയ ചെയർപേഴ്സൺ തിരഞ്ഞെടുപ്പ് അനിവാര്യമായത്. നഗരസഭ ഉപാധ്യക്ഷയായി പ്രവർത്തിച്ചു വരികയായിരുന്ന മായാ രാഹുൽ, തിരഞ്ഞെടുപ്പ് വിജയത്തോടെ പുതിയ ചെയർപേഴ്സണായി ചുമതലയേറ്റു.
