കേരളത്തിൽ നിയമസഭാ തിരഞ്ഞെടുപ്പ് പ്രചാരണം അവസാനഘട്ടത്തിലേക്ക് കടക്കുമ്പോൾ പ്രമുഖ നേതാക്കൾ ഇന്ന് സംസ്ഥാനത്തെ വിവിധ മണ്ഡലങ്ങളിൽ സജീവമാകും. പ്രധാനമന്ത്രി നരേന്ദ്ര മോദി, കോൺഗ്രസ് നേതാവ് രാഹുൽ ഗാന്ധി, മുഖ്യമന്ത്രി പിണറായി വിജയൻ എന്നിവരാണ് ഇന്ന് കേരളത്തിൽ വിവിധയിടങ്ങളിൽ വോട്ടർമാരെ കാണുന്നത്.
എൻഡിഎ സ്ഥാനാർത്ഥികളുടെ പ്രചാരണത്തിനായി പ്രധാനമന്ത്രി നരേന്ദ്ര മോദി ഇന്ന് വൈകുന്നേരത്തോടെ കേരളത്തിലെത്തും. തിരുവനന്തപുരത്തും പത്തനംതിട്ടയിലുമാണ് പ്രധാനമന്ത്രിയുടെ ഇന്നത്തെ പരിപാടികൾ. തിരുവനന്തപുരത്ത് കിള്ളിപ്പാലം മുതൽ കരമന വരെ വമ്പിച്ച റോഡ് ഷോയാണ് ബിജെപി ക്രമീകരിച്ചിരിക്കുന്നത്. തിരുവനന്തപുരം ജില്ലയിൽ വലിയ വിജയപ്രതീക്ഷ പുലർത്തുന്ന ബിജെപി, പ്രധാനമന്ത്രിയുടെ സന്ദർശനത്തിലൂടെ വോട്ടർമാരെ സ്വാധീനിക്കാമെന്ന കണക്കുകൂട്ടലിലാണ്.
യുഡിഎഫ് പ്രചാരണത്തിന് കരുത്തുപകരാൻ രാഹുൽ ഗാന്ധി ഇന്ന് വീണ്ടും കേരളത്തിലെത്തുന്നുണ്ട്. എറണാകുളം, ആലപ്പുഴ, ഇടുക്കി ജില്ലകളിലെ തിരഞ്ഞെടുപ്പ് പൊതുയോഗങ്ങളിൽ അദ്ദേഹം സംസാരിക്കും. ആലപ്പുഴയിലെ മുഹമ്മയിലും ഇടുക്കിയിലെ കട്ടപ്പനയിലും നടക്കുന്ന റാലികളിൽ രാഹുൽ ഗാന്ധി പങ്കെടുക്കും. തുടർന്ന് എറണാകുളം ജില്ലയിലെ വിവിധ മണ്ഡലങ്ങളിലെ പ്രചാരണ പരിപാടികളിലും അദ്ദേഹം വോട്ടഭ്യർത്ഥിക്കും.
സ്വന്തം മണ്ഡലമായ ധർമ്മടം കേന്ദ്രീകരിച്ചാണ് മുഖ്യമന്ത്രി പിണറായി വിജയന്റെ ഇന്നത്തെ പ്രചാരണം. മണ്ഡലത്തിലെ എല്ലാ ലോക്കൽ കമ്മിറ്റി പരിധികളിലും അദ്ദേഹം പര്യടനം നടത്തും. തിരഞ്ഞെടുപ്പിന് അഞ്ച് ദിവസങ്ങൾ മാത്രം ബാക്കിനിൽക്കെ, സ്വന്തം മണ്ഡലത്തിൽ പരമാവധി വോട്ടുകൾ ഉറപ്പിക്കാനാണ് മുഖ്യമന്ത്രിയുടെ ശ്രമം. വരും ദിവസങ്ങളിലും അദ്ദേഹം ധർമ്മടത്ത് പ്രചാരണത്തിൽ തുടരും. ഏപ്രിൽ ആറിന് മണ്ഡലത്തിൽ വമ്പിച്ച റോഡ് ഷോയും മുഖ്യമന്ത്രിയുടെ നേതൃത്വത്തിൽ നടക്കും.
പ്രമുഖ നേതാക്കളുടെ സാന്നിധ്യം കേരളത്തിലെ തിരഞ്ഞെടുപ്പ് പോരാട്ടത്തെ കൂടുതൽ വാശിയുള്ളതാക്കി മാറ്റിയിരിക്കുകയാണ്. മൂന്ന് മുന്നണികളും വിജയപ്രതീക്ഷയോടെയാണ് പ്രചാരണരംഗത്ത് സജീവമായിരിക്കുന്നത്.
നിങ്ങൾ അറിയാൻ ആഗ്രഹിക്കുന്ന
വാർത്തകൾ നിങ്ങളുടെ കൈക്കുമ്പിളിൽ
