ഹോർമുസ് കടലിടുക്കിലെ സംഘർഷാവസ്ഥയിൽ നിർണ്ണായക നിലപാടുമായി അമേരിക്ക. ഇറാൻ ആക്രമണങ്ങൾക്ക് മറുപടിയായി ആരംഭിച്ച സൈനിക നടപടിയായ 'ഓപ്പറേഷൻ പ്രൊജക്റ്റ് ഫ്രീഡം' താൽക്കാലികമായി നിർത്തിവെച്ചതായി അമേരിക്കൻ പ്രസിഡന്റ് ഡൊണാൾഡ് ട്രംപ് അറിയിച്ചു. ഇറാനുമായി ധാരണയിലെത്തിയതിനെ തുടർന്നാണ് ഈ തീരുമാനമെന്ന് ട്രംപ് തന്റെ സോഷ്യൽ മീഡിയ അക്കൗണ്ടിലൂടെ വ്യക്തമാക്കി.
ഇറാനുമായുള്ള ചർച്ചകളിൽ കാര്യമായ പുരോഗതി ഉണ്ടായിട്ടുണ്ടെന്നും, സംഘർഷം ലഘൂകരിക്കുന്നതിന്റെ ഭാഗമായാണ് സൈനിക നടപടി നിർത്തിവെക്കുന്നതെന്നും ട്രംപ് പറഞ്ഞു. അതേസമയം, 'ഓപ്പറേഷൻ എപിക് ഫ്യൂറി' എന്ന സൈനിക നടപടിയുടെ ലക്ഷ്യങ്ങൾ പൂർത്തിയായതായി യുഎസ് സ്റ്റേറ്റ് സെക്രട്ടറി മാർക്ക് റൂബിയോ അറിയിച്ചു. ഇറാൻ സൈനിക നടപടികളിൽ നിന്ന് പിന്മാറാൻ തയ്യാറാണെങ്കിൽ ചർച്ചകൾ തുടരാമെന്നും അദ്ദേഹം വ്യക്തമാക്കി.
ഹോർമുസ് കടലിടുക്ക് വീണ്ടും തുറക്കുന്നതിനും സമാധാന ചർച്ചകൾ മുന്നോട്ട് കൊണ്ടുപോകുന്നതിനുമുള്ള ആഗ്രഹം അമേരിക്ക പ്രകടിപ്പിച്ചു. എന്നാൽ, ഇറാൻ വീണ്ടും സൈനിക നടപടികളിലേക്ക് കടക്കുകയാണെങ്കിൽ ശക്തമായ തിരിച്ചടി നേരിടേണ്ടി വരുമെന്നും യുഎസ് മുന്നറിയിപ്പ് നൽകി. മേഖലയിൽ സമാധാനം പുനസ്ഥാപിക്കുന്നതിന് ഇറാൻ അനുകൂലമായ നിലപാട് സ്വീകരിക്കണമെന്നും റൂബിയോ ആവശ്യപ്പെട്ടു.
