വയനാട് മേപ്പാടി കല്ലാടിയിലെ ആനക്കാംപൊയിൽ-കല്ലാടി-മേപ്പാടി തുരങ്കപാത നിർമാണ മേഖലയിലുണ്ടായ വൻ മണ്ണിടിച്ചിലിൽ കാണാതായ ഹിമാചൽ പ്രദേശ് സ്വദേശി വിക്രം സിംഗ് റാണയ്ക്കായുള്ള തെരച്ചിൽ അഞ്ചാം ദിവസവും ഊർജിതമായി തുടരുന്നു. ദുരന്തമേഖലയെ വിവിധ സോണുകളായി തിരിച്ചാണ് നിലവിൽ പരിശോധന പുരോഗമിക്കുന്നത്. ദൗത്യസംഘം പ്രധാനമായും ഒന്നാം സോണിലും രണ്ടാം സോണിലുമാണ് നിലവിൽ തെരച്ചിൽ കേന്ദ്രീകരിച്ചിരിക്കുന്നത്. കൺസ്ട്രക്ഷൻ മാനേജരായ വിക്രം റാണ രണ്ടാം സോണിലെ അവശിഷ്ടങ്ങൾക്കിടയിൽ ഉണ്ടാകാം എന്ന നിഗമനത്തിലാണ് രക്ഷാപ്രവർത്തകർ ഈ മേഖലയിൽ ശ്രദ്ധ കേന്ദ്രീകരിക്കുന്നത്.
കഴിഞ്ഞ ചൊവ്വാഴ്ചയുണ്ടായ ദുരന്തത്തിൽ ഇതുവരെ ഏഴുപേരുടെ മരണമാണ് സ്ഥിരീകരിച്ചിട്ടുള്ളത്. കഴിഞ്ഞദിവസം മീനാക്ഷി പാലത്തിന് സമീപമുള്ള പുഴയുടെ താഴ്ഭാഗത്തുനിന്നും സർവേയർ രാകേഷ് ഗുച്ചൈതിൻ്റെ മൃതദേഹം കണ്ടെത്തിയിരുന്നു. ഇതോടെ ദുരന്തത്തിൽ മരിച്ചവരുടെ എണ്ണം ഏഴായി ഉയർന്നു. കാണാതായ വിക്രം റാണയെക്കൂടി കണ്ടെത്താനായാൽ ഈ മേഖലയിലെ പ്രധാന രക്ഷാദൗത്യം പൂർത്തിയാകും.അതേസമയം, അപകടത്തിൽ പരിക്കേറ്റ് ആശുപത്രിയിൽ ചികിത്സയിൽ കഴിയുന്നവരുടെ ആരോഗ്യനില നിലവിൽ തൃപ്തികരമായി തുടരുന്നതായി ഡോക്ടർമാർ അറിയിച്ചു.
