തമിഴക രാഷ്ട്രീയത്തിൽ പുതിയൊരു മാറ്റത്തിന് തുടക്കം കുറിച്ചുകൊണ്ട് തമിഴക വെട്രി കഴകം (ടിവികെ) അധ്യക്ഷൻ വിജയ് തമിഴ്നാട് മുഖ്യമന്ത്രിയായി സത്യപ്രതിജ്ഞ ചെയ്ത് അധികാരമേറ്റു. ചെന്നൈയിലെ നെഹ്റു സ്റ്റേഡിയത്തിൽ നടന്ന പ്രൗഢഗംഭീരമായ ചടങ്ങിൽ ഗവർണർ രാജേന്ദ്ര വിശ്വനാഥ് അർലേക്കർ സത്യവാചകം ചൊല്ലിക്കൊടുത്തു. ദൈവനാമത്തിലാണ് വിജയ് സത്യപ്രതിജ്ഞ ചെയ്തത്. വിജയിക്കൊപ്പം ഒമ്പത് മന്ത്രിമാരും സത്യപ്രതിജ്ഞ ചെയ്ത് ചുമതലയേറ്റു.
ലോക്സഭാ പ്രതിപക്ഷ നേതാവ് രാഹുൽ ഗാന്ധി ഉൾപ്പെടെയുള്ള പ്രമുഖ നേതാക്കൾ ചടങ്ങിൽ സംബന്ധിച്ചു. തമിഴ്നാട്ടിൽ 'പുതിയൊരു യുഗത്തിന്' തുടക്കമായെന്ന് സത്യപ്രതിജ്ഞയ്ക്ക് ശേഷം അണികളെ അഭിസംബോധന ചെയ്ത വിജയ് പറഞ്ഞു. മതേതരത്വവും സാമൂഹിക നീതിയും ഉറപ്പാക്കുന്ന ഭരണമായിരിക്കും തന്റേതെന്ന് അദ്ദേഹം വ്യക്തമാക്കി. അഴിമതിയില്ലാത്ത സുതാര്യമായ ഒരു സർക്കാർ തമിഴ്നാട് ജനതയ്ക്ക് മുന്നിൽ അവതരിപ്പിക്കുമെന്നും, തന്റെ കൂടെയുള്ളവർ തെറ്റ് ചെയ്താലും സംരക്ഷിക്കില്ലെന്നും അദ്ദേഹം കൂട്ടിച്ചേർത്തു.
അധികാരമേറ്റ ഉടൻ തന്നെ ജനക്ഷേമകരമായ മൂന്ന് നിർണ്ണായക ഉത്തരവുകളിൽ മുഖ്യമന്ത്രി വിജയ് ഒപ്പുവെച്ചു. സംസ്ഥാനത്ത് സ്ത്രീ സുരക്ഷ ഉറപ്പാക്കുന്നതിനായി പ്രത്യേക സുരക്ഷാ സ്ക്വാഡ് രൂപീകരിക്കുക, ലഹരി ഉപയോഗവും വ്യാപനവും തടയാൻ കർശന നടപടികൾ സ്വീകരിക്കുക എന്നിവയായിരുന്നു ഇതിൽ പ്രധാനപ്പെട്ടത്. കൂടാതെ, തന്റെ പ്രകടനപത്രികയിലെ വാഗ്ദാനമായ മാസം 200 യൂണിറ്റ് വൈദ്യുതി സൗജന്യമായി നൽകുന്ന പദ്ധതിക്കും അദ്ദേഹം അംഗീകാരം നൽകി.
സിനിമാ ലോകത്തുനിന്ന് രാഷ്ട്രീയത്തിന്റെ അമരത്തേക്ക് എത്തിയ വിജയിന്റെ കന്നി രാഷ്ട്രീയ പരീക്ഷണം വൻ വിജയമായതോടെ തമിഴകം വലിയ ആവേശത്തിലാണ്. എംജിആറിനും ജയലളിതയ്ക്കും ശേഷം ഒരു സൂപ്പർതാരം തമിഴ്നാടിന്റെ മുഖ്യമന്ത്രി പദത്തിലെത്തുന്ന ചരിത്ര നിമിഷത്തിനാണ് ഇന്ന് ചെന്നൈ സാക്ഷ്യം വഹിച്ചത്. വരും ദിവസങ്ങളിൽ തന്റെ വികസന കാഴ്ചപ്പാടുകളും പദ്ധതികളും മുഖ്യമന്ത്രി ഔദ്യോഗികമായി പ്രഖ്യാപിക്കുമെന്നാണ് പ്രതീക്ഷിക്കുന്നത്.
