നിയുക്ത മുഖ്യമന്ത്രി വി.ഡി. സതീശന്റെ നേതൃത്വത്തിലുള്ള യുഡിഎഫ് സർക്കാരിന്റെ സത്യപ്രതിജ്ഞാ ചടങ്ങിനുള്ള ഒരുക്കങ്ങൾ അവസാന ഘട്ടത്തിൽ. തിരുവനന്തപുരം സെൻട്രൽ സ്റ്റേഡിയത്തിൽ ഒരു ലക്ഷത്തോളം പേരെ ഉൾക്കൊള്ളാൻ കഴിയുന്ന കൂറ്റൻ വേദിയുടെയും പന്തലിന്റെയും പണികൾ പൂർത്തിയായിക്കഴിഞ്ഞു. നാളെ രാവിലെ 10 മണിക്കാണ് കേരളം കാത്തിരിക്കുന്ന സത്യപ്രതിജ്ഞാ ചടങ്ങുകൾ ആരംഭിക്കുന്നത്.
മുഖ്യമന്ത്രി ഉൾപ്പെടെ 21 അംഗ മന്ത്രിസഭയാണ് നാളെ അധികാരമേൽക്കുന്നത്. രാജ്ഭവനിൽ നിന്നുള്ള ഔദ്യോഗിക അറിയിപ്പ് പ്രകാരം ഗവർണർ രാജേന്ദ്ര അർലേക്കർ മന്ത്രിമാർക്ക് സത്യവാചകം ചൊല്ലിക്കൊടുക്കും.
സത്യപ്രതിജ്ഞാ ചടങ്ങ് വൻ ആഘോഷമാക്കാനാണ് യുഡിഎഫ് തീരുമാനം. കോൺഗ്രസ് അധ്യക്ഷൻ മല്ലികാർജ്ജുൻ ഖാർഗെ, ലോക്സഭാ പ്രതിപക്ഷ നേതാവ് രാഹുൽ ഗാന്ധി, പ്രിയങ്ക ഗാന്ധി എംപി എന്നിവർ ചടങ്ങിൽ നേരിട്ട് പങ്കെടുക്കും. ഇവരെ കൂടാതെ വിവിധ സംസ്ഥാനങ്ങളിലെ മുഖ്യമന്ത്രിമാരായ സിദ്ധരാമയ്യ (കർണാടക), രേവന്ത് റെഡ്ഡി (തെലങ്കാന), സുഖ്‌വിന്ദർ സിങ് സുഖു (ഹിമാചൽ പ്രദേശ്) എന്നിവരും കർണാടക ഉപമുഖ്യമന്ത്രി ഡി.കെ. ശിവകുമാറും തലസ്ഥാനത്തെത്തും. തമിഴ്നാട് മുഖ്യമന്ത്രി സി. ജോസഫ് വിജയ് ചടങ്ങിൽ പങ്കെടുത്തേക്കുമെന്നും റിപ്പോർട്ടുകളുണ്ട്.
ഒരു ലക്ഷത്തോളം പ്രവർത്തകർ എത്തുമെന്ന് പ്രതീക്ഷിക്കുന്നതിനാൽ നഗരത്തിൽ കനത്ത സുരക്ഷാ ക്രമീകരണങ്ങളാണ് പോലീസ് ഏർപ്പെടുത്തിയിരിക്കുന്നത്. സെൻട്രൽ സ്റ്റേഡിയത്തിലേക്കുള്ള പ്രവേശനം കർശനമായ സുരക്ഷാ പരിശോധനകൾക്ക് വിധേയമായിട്ടായിരിക്കും. ഉച്ചയോടെ മന്ത്രിമാരുടെ വകുപ്പ് വിഭജന കാര്യത്തിലും കൂടുതൽ വ്യക്തത വരുമെന്നാണ് സൂചന.
