ഹോർമുസ് കടലിടുക്കിൽ അന്താരാഷ്ട്ര കപ്പൽ ഗതാഗതത്തിന് ഭീഷണിയുയർത്തിയ രണ്ട് ഇറാനിയൻ ഡ്രോണുകൾ അമേരിക്കൻ സൈന്യം വെടിവെച്ചിട്ടു. സുരക്ഷാ മുൻകരുതലുകളുടെ ഭാഗമായാണ് ഡ്രോണുകൾ തകർത്തതെന്ന് അമേരിക്കൻ പ്രതിരോധ മന്ത്രാലയം വ്യക്തമാക്കി.
ആഗോള എണ്ണ വ്യാപാരത്തിന്റെ ഏറ്റവും പ്രധാനപ്പെട്ട പാതയായ ഹോർമുസ് കടലിടുക്കിൽ സ്വാധീനം ഉറപ്പിക്കാൻ ഇറാൻ നടത്തുന്ന സൈനിക നീക്കങ്ങൾ വലിയ പ്രതിസന്ധിയാണ് സൃഷ്ടിക്കുന്നത്. ഈ സാഹചര്യത്തിലാണ് മേഖലയിലൂടെ കടന്നുപോകുന്ന കപ്പലുകൾക്ക് നേരെ നിരീക്ഷണം നടത്തുകയായിരുന്ന ഇറാൻ ഡ്രോണുകളെ അമേരിക്ക ലക്ഷ്യമിട്ടത്.
ഇരുരാജ്യങ്ങളും തമ്മിലുള്ള നയതന്ത്ര ചർച്ചകൾ പുരോഗമിക്കുന്നതിനിടയിലാണ് പുതിയ സംഘർഷം ഉടലെടുത്തിരിക്കുന്നത്. ഹോർമുസിലെ ഇറാന്റെ ഇടപെടലുകൾക്ക് ശക്തമായ തിരിച്ചടി നൽകാനാണ് തങ്ങളുടെ തീരുമാനമെന്ന് അമേരിക്കൻ അധികൃതർ വ്യക്തമാക്കി. പുതിയ സംഭവവികാസങ്ങളെ തുടർന്ന് പശ്ചിമേഷ്യൻ മേഖലയിൽ വീണ്ടും യുദ്ധഭീതിയും അസ്ഥിരതയും വർദ്ധിച്ചതായാണ് അന്താരാഷ്ട്ര നിരീക്ഷകർ വിലയിരുത്തുന്നത്.
