ഹോർമുസ് കടലിടുക്കിൽ യു.എസ് നാവികസേനയുടെ അപ്പാച്ചെ ഹെലികോപ്റ്റർ തകർന്നുവീണു. ഹെലികോപ്റ്ററിലുണ്ടായിരുന്ന രണ്ട് പൈലറ്റുമാരെയും സുരക്ഷിതമായി രക്ഷപ്പെടുത്തിയതായി സൈനിക വൃത്തങ്ങൾ അറിയിച്ചു. എന്നാൽ അപകടത്തിന്റെ കൃത്യമായ കാരണം വ്യക്തമാക്കാൻ യു.എസ് ഭരണകൂടം ഇതുവരെ തയ്യാറായിട്ടില്ല.
ഇസ്രായേലും ഇറാനും തമ്മിൽ പരസ്പര വ്യോമാക്രമണം നടത്തിയ തിങ്കളാഴ്ചയാണ് ഹെലികോപ്റ്റർ തകർന്നുവീണത്. അതുകൊണ്ട് തന്നെ സാങ്കേതിക തകരാറാണോ അതോ ഇറാന്റെ ഭാഗത്തുനിന്നുള്ള വെടിവെയ്പ്പാണോ അപകടത്തിന് കാരണമായത് എന്നതിൽ ദുരൂഹത നിലനിൽക്കുന്നുണ്ട്.
സംഭവത്തെക്കുറിച്ച് വിശദമായ അന്വേഷണം നടക്കുകയാണെന്നും നാളെ പെന്റഗൺ ഇതുസംബന്ധിച്ച അന്തിമ റിപ്പോർട്ട് സമർപ്പിക്കുമെന്നും യു.എസ് പ്രസിഡന്റ് ഡൊണാൾഡ് ട്രംപ് മാധ്യമങ്ങളോട് വ്യക്തമാക്കി. അതിനുശേഷമേ അപകടകാരണത്തിൽ കൂടുതൽ വ്യക്തത വരികയുള്ളൂ. പശ്ചിമേഷ്യയിൽ നിലവിൽ യുദ്ധസമാനമായ അന്തരീക്ഷം നിലനിൽക്കുന്നതിനാൽ അതീവ ജാഗ്രതയോടെയാണ് പ്രതിരോധ മന്ത്രാലയം ഈ വിഷയത്തെ കൈകാര്യം ചെയ്യുന്നത്.
