വിദേശ സംഭാവന നിയന്ത്രണ ഭേദഗതി ബിൽ (FCRA Amendment Bill) വരാനിരിക്കുന്ന പാർലമെന്റിന്റെ വർഷകാല സമ്മേളനത്തിൽ പാസാക്കാൻ കേന്ദ്ര സർക്കാർ നീക്കം സജീവമാക്കി. കഴിഞ്ഞ പാർലമെന്റ് സമ്മേളനത്തിൽ അവതരിപ്പിച്ച ബില്ലിൽ യാതൊരുവിധ മാറ്റങ്ങളും വരുത്താതെ, അതേപടി വീണ്ടും സഭയിൽ അവതരിപ്പിച്ചു പാസാക്കാനാണ് സർക്കാർ ഒരുങ്ങുന്നത്. തിങ്കളാഴ്ച ആരംഭിക്കുന്ന വർഷകാല സമ്മേളനത്തിൽ പാർലമെന്റ് ബുള്ളറ്റിനിൽ രജിസ്റ്റർ ചെയ്തിട്ടുള്ള ഏഴ് പ്രധാന ബില്ലുകളിൽ ഒന്നാണിത്.
നിശ്ചിത സമയപരിധിക്കുള്ളിൽ എഫ്.സി.ആർ.എ ലൈസൻസ് പുതുക്കി ലഭിക്കാതിരിക്കുകയോ, അല്ലെങ്കിൽ റദ്ദാക്കപ്പെട്ട ലൈസൻസ് പുനഃസ്ഥാപിക്കപ്പെടാതിരിക്കുകയോ ചെയ്താൽ, അത്തരം സംഘടനകളുടെ ആസ്തികൾ കേന്ദ്ര സർക്കാരിന് നേരിട്ട് ഏറ്റെടുക്കാം എന്ന വിവാദ വ്യവസ്ഥയാണ് ഈ ഭേദഗതി ബില്ലിലുള്ളത്. ഈ വ്യവസ്ഥ രാജ്യത്തെ വിവിധ എൻ.ജി.ഒകളെയും സന്നദ്ധ സംഘടനകളെയും കടുത്ത ആശങ്കയിലാഴ്ത്തിയിട്ടുണ്ട്.
കഴിഞ്ഞ തവണ ബിൽ പാർലമെന്റിൽ അവതരിപ്പിച്ചപ്പോൾ തന്നെ ക്രൈസ്തവ സഭകളിൽ നിന്നും വിവിധ സംഘടനകളിൽ നിന്നും കടുത്ത പ്രതിഷേധം ഉയർന്നിരുന്നു. ഇതേത്തുടർന്നാണ് അന്ന് ബിൽ പരിഗണിക്കുന്നത് താൽക്കാലികമായി മാറ്റിവെച്ചത്. ബിൽ പൂർണ്ണമായും പിൻവലിക്കണമെന്ന് ആവശ്യപ്പെട്ട് കാത്തലിക് ബിഷപ്സ് കോൺഫറൻസ് ഓഫ് ഇന്ത്യ (CBCI) പ്രതിനിധി സംഘം കഴിഞ്ഞ ആഴ്ച കേന്ദ്ര ആഭ്യന്തര മന്ത്രി അമിത് ഷായെ കണ്ട് ചർച്ച നടത്തി ആശങ്ക അറിയിച്ചിരുന്നു. എന്നാൽ ഈ ചർച്ചകൾക്ക് ശേഷവും മാറ്റങ്ങളില്ലാതെ ബില്ലുമായി മുന്നോട്ട് പോകാനാണ് കേന്ദ്രത്തിന്റെ തീരുമാനം. ബിൽ വീണ്ടും സഭയിൽ കൊണ്ടുവരുന്നതോടെ പ്രതിപക്ഷത്തിന്റെ ഭാഗത്തുനിന്നും ശക്തമായ പ്രതിഷേധം ഉണ്ടാകുമെന്നാണ് സൂചന.
എഫ്.സി.ആർ.എ ഭേദഗതി ബില്ലിന് പുറമെ, നേരത്തെ ഭരണപക്ഷത്തിന് ആവശ്യത്തിന് അംഗബലം ഇല്ലാത്തതിനാൽ പാസാക്കാൻ സാധിക്കാതിരുന്ന വനിതാ സംവരണ ഭേദഗതി ബില്ലും, മണ്ഡല പുനർനിർണ്ണയ ബില്ലും ഈ സമ്മേളനത്തിൽ വീണ്ടും കൊണ്ടുവരാനുള്ള നീക്കങ്ങൾ സജീവമാണ്. തിങ്കളാഴ്ച വർഷകാല സമ്മേളനം ആരംഭിക്കുമ്പോൾ പാർലമെന്റിൽ വൻ ഭരണ-പ്രതിപക്ഷ ഏറ്റുമുട്ടലുകൾക്ക് ഈ ബില്ലുകൾ വഴിവെച്ചേക്കും.
