വിഴിഞ്ഞം അന്താരാഷ്ട്ര തുറമുഖത്തുനിന്നും കരമാർഗ്ഗമുള്ള ചരക്കുനീക്കം ആരംഭിക്കാൻ വഴിയൊരുങ്ങുന്നു. ഇതുസംബന്ധിച്ച ഔദ്യോഗിക പ്രഖ്യാപനം ഉടനുണ്ടാകുമെന്നാണ് റിപ്പോർട്ടുകൾ. ഈ മാസം തന്നെ റോഡ് മാർഗ്ഗമുള്ള ചരക്കുനീക്കം ആരംഭിക്കാനാണ് സർക്കാർ ലക്ഷ്യമിടുന്നത്. നിലവിൽ വിഴിഞ്ഞത്ത് മറ്റ് കപ്പലുകളിലേക്ക് ചരക്കുകൾ മാറ്റിക്കയറ്റുന്ന കടൽമാർഗ്ഗമുള്ള ട്രാൻസ്ഷിപ്പ്മെന്റ് മാത്രമാണ് നടക്കുന്നത്. എക്സിം (കയറ്റുമതി-ഇറക്കുമതി) ചരക്കുകൾ കരമാർഗ്ഗം നീക്കാൻ ആരംഭിക്കുന്നത് വിഴിഞ്ഞം തുറമുഖത്തിന്റെ ചരിത്രത്തിലെ വലിയൊരു നാഴികക്കല്ലാകും.
തുറമുഖത്ത് നിന്നും ദേശീയപാത 66-ലേക്ക് ബന്ധിപ്പിക്കുന്ന കണക്റ്റിവിറ്റി റോഡിൽ കഴിഞ്ഞ ദിവസങ്ങളിൽ നടത്തിയ കണ്ടെയ്നർ ട്രക്കുകളുടെ ട്രയൽ റൺ വിജയകരമായിരുന്നു. തുടർന്ന് ദേശീയപാത അതോറിറ്റി (NHAI) സുരക്ഷാ പരിശോധനകൾ പൂർത്തിയാക്കി തങ്ങളുടെ റിപ്പോർട്ട് സമർപ്പിച്ചു കഴിഞ്ഞു. അപ്രോച്ച് റോഡിൽ സ്ട്രീറ്റ് ലൈറ്റുകൾ സ്ഥാപിക്കുക, സിഗ്നൽ സംവിധാനങ്ങൾ ഒരുക്കുക, ദിശാസൂചക ബോർഡുകൾ സ്ഥാപിക്കുക തുടങ്ങിയ നിർദ്ദേശങ്ങളാണ് അതോറിറ്റി മുന്നോട്ടുവെച്ചിട്ടുള്ളത്. കസ്റ്റംസ് പരിശോധനകൾക്കുള്ള സജ്ജീകരണങ്ങളും ഇതിനകം പൂർത്തിയായിട്ടുണ്ട്.
ഈ സുപ്രധാന പദ്ധതിക്ക് മുഖ്യമന്ത്രിയും ദേശീയപാത അതോറിറ്റിയും പൂർണ്ണ അനുമതി നൽകിയിട്ടുണ്ട്. നേരത്തെ ദേശീയപാതയിലെ നിർമ്മാണ പ്രവർത്തനങ്ങളും ചില സാങ്കേതിക പ്രശ്നങ്ങളുമായിരുന്നു ഇതിന് കാലതാമസമുണ്ടാക്കിയത്. എന്നാൽ കൊല്ലം-തിരുവനന്തപുരം പാതയിലെ പണികൾ അവസാനഘട്ടത്തിലെത്തിയ സാഹചര്യത്തിൽ ഇനിയുള്ള നീക്കങ്ങൾ വേഗത്തിലാകും. പദ്ധതി യാഥാർത്ഥ്യമാകുന്നതോടെ വിഴിഞ്ഞത്ത് എത്തുന്ന കശുവണ്ടി, മത്സ്യവിഭവങ്ങൾ അടക്കമുള്ള അന്താരാഷ്ട്ര ചരക്കുകൾ കൊല്ലം, ആലപ്പുഴ ഉൾപ്പെടെയുള്ള മറ്റു ജില്ലകളിലേക്ക് റോഡ് മാർഗ്ഗം വേഗത്തിൽ എത്തിക്കാൻ സാധിക്കും.
