സംസ്ഥാന ആസൂത്രണ ബോർഡിലെ ഉയർന്ന തസ്തികകളിലേക്കുള്ള പി.എസ്.സി നിയമന പരീക്ഷയിൽ നടന്ന ക്രമക്കേടുകൾ സംബന്ധിച്ച് വിജിലൻസ് അന്വേഷണം പ്രഖ്യാപിക്കുന്നതിൽ സർക്കാർ നാളെ അന്തിമ തീരുമാനമെടുക്കും. നാളെ (ബുധനാഴ്ച) ചേരുന്ന സംസ്ഥാന മന്ത്രിസഭായോഗത്തിൽ ഈ വിഷയം ചർച്ചയ്ക്കെത്തും. പി.എസ്.സി പോലുള്ള ഭരണഘടനാ സ്ഥാപനത്തിൽ സംസ്ഥാന സർക്കാരിന് വിജിലൻസ് അന്വേഷണം നടത്തുന്നതിന് നിയമപരമായ തടസ്സങ്ങളില്ലെന്ന നിയമോപദേശത്തിന്റെ അടിസ്ഥാനത്തിലാണ് സർക്കാർ നടപടികളിലേക്ക് കടക്കുന്നത്.
വിഷയം വലിയ രാഷ്ട്രീയ-സാമൂഹിക വിവാദമായി മാറിയതോടെ കഴിഞ്ഞ ദിവസം ചേർന്ന പി.എസ്.സി യോഗം കേസ് അന്വേഷണം സ്വന്തം ആഭ്യന്തര വിജിലൻസ് വിഭാഗത്തിന് കൈമാറിയിരുന്നു. ക്രമക്കേട് അന്വേഷിക്കാൻ ആഭ്യന്തര വിജിലൻസ് എസ്പിയെ (ക്രൈംബ്രാഞ്ച് എസ്.പി സിനി എഫ്. ഡെന്നിസ്) ചുമതലപ്പെടുത്തുകയും രണ്ടാഴ്ചയ്ക്കകം ഇടക്കാല റിപ്പോർട്ട് സമർപ്പിക്കാൻ നിർദ്ദേശിക്കുകയും ചെയ്തിട്ടുണ്ട്.
ആദ്യം വിജിലൻസ് അന്വേഷണത്തിന് തീരുമാനിച്ചിരുന്നെങ്കിലും പി.എസ്.സി ചെയർമാൻ ഡോ. എം.ആർ. ബൈജു ആ തീരുമാനം മരവിപ്പിച്ച് അന്വേഷണം പരീക്ഷാ കൺട്രോളർക്ക് കൈമാറിയത് കമ്മീഷൻ അംഗങ്ങൾക്കിടയിൽ കടുത്ത അതൃപ്തിക്ക് കാരണമായിരുന്നു. ചെയർമാന്റെ ഈ നീക്കം അന്വേഷണം അട്ടിമറിക്കാനുള്ള ശ്രമത്തിന്റെ ഭാഗമാണെന്ന ആക്ഷേപം ഉയർന്നതോടെ ഇന്നലെ ചേർന്ന യോഗത്തിൽ ഒരു വിഭാഗം അംഗങ്ങൾ ചെയർമാനെതിരെ കടുത്ത വിമർശനമുയർത്തി. ഇതേതുടർന്നാണ് മുൻ തീരുമാനം തിരുത്തി അന്വേഷണം വീണ്ടും ആഭ്യന്തര വിജിലൻസ് എസ്പിക്ക് തന്നെ കൈമാറാൻ ചെയർമാൻ നിർബന്ധിതനായത്.
ആസൂത്രണ ബോർഡിലെ ചീഫ് (ഇൻഡസ്ട്രി ആൻഡ് ഇൻഫ്രാസ്ട്രക്ചർ), ചീഫ് (പെഴ്സ്പെക്ടീവ് പ്ലാനിങ് ഡിവിഷൻ), ചീഫ് (പ്ലാനിങ് കോ-ഓർഡിനേഷൻ ഡിവിഷൻ) എന്നീ ഉയർന്ന തസ്തികകളിലേക്ക് നടന്ന പരീക്ഷാ മൂല്യനിർണ്ണയത്തിലാണ് ഗുരുതര ക്രമക്കേടുകൾ കണ്ടെത്തിയത്. 100 മാർക്കിന്റെ പരീക്ഷയിൽ 58 മാർക്ക് വരുന്ന പത്ത് വിവരണാത്മക ചോദ്യങ്ങൾ ഓൺ സ്ക്രീൻ മാർക്കിങ് (OSM) വഴി മൂല്യനിർണ്ണയം നടത്താതെയാണ് ഒഴിവാക്കപ്പെട്ടത്. എന്നാൽ ഈ വിവരം മറച്ചുവെച്ച് റാങ്ക് പട്ടിക പ്രസിദ്ധീകരിക്കുകയും നിയമന ശുപാർശ നൽകുകയും ചെയ്തു. ഉദ്യോഗാർത്ഥികൾ വിവരാവകാശ നിയമപ്രകാരം നൽകിയ അപേക്ഷയിലൂടെയാണ് ഈ വലിയ അട്ടിമറി പുറത്തുവന്നത്.
ഇതിനു പുറമെ, അസിസ്റ്റന്റ് ഇൻഫർമേഷൻ ഓഫീസർ നിയമനത്തിലടക്കം അടുത്ത കാലത്തുണ്ടായ മറ്റ് ചില പി.എസ്.സി നിയമനങ്ങളിലെ ക്രമക്കേടുകളെക്കുറിച്ചും സമഗ്രമായ വിജിലൻസ് അന്വേഷണം വേണമെന്ന ആവശ്യം ഉയർന്നിട്ടുണ്ട്.
വിവാദ പരീക്ഷയുമായി ബന്ധപ്പെട്ട ഉദ്യോഗാർത്ഥികളുടെ ഉത്തരക്കടലാസുകൾ, പരീക്ഷാ പേപ്പറുകൾ, അഭിമുഖത്തിന്റെ മാർക്ക് വിവരങ്ങൾ എന്നിവ ഏഴ് ദിവസത്തിനകം അപേക്ഷകർക്ക് നൽകണമെന്ന് സംസ്ഥാന വിവരാവകാശ കമ്മീഷണർ സോണിച്ചൻ പി. ജോസഫ് പി.എസ്.സിക്ക് കർശന നിർദ്ദേശം നൽകിയിട്ടുണ്ട്. രേഖകൾ നൽകാൻ വിസമ്മതിച്ച പി.എസ്.സിയുടെ നടപടി ന്യായീകരിക്കാനാകാത്തതാണെന്ന് കമ്മീഷൻ ചൂണ്ടിക്കാട്ടി.
പി.എസ്.സി.യുടെ ആഭ്യന്തര അന്വേഷണ റിപ്പോർട്ടിനായി സർക്കാർ കാത്തിരിക്കുമോ അതോ നാളത്തെ മന്ത്രിസഭായോഗത്തിൽ തന്നെ വിജിലൻസ് ആൻഡ് ആന്റി കറപ്ഷൻ ബ്യൂറോയുടെ (VACB) സമഗ്ര അന്വേഷണം പ്രഖ്യാപിക്കുമോ എന്നതിലാണ് ഇപ്പോൾ ഉദ്യോഗാർത്ഥികളുടെയും പൊതുജനങ്ങളുടെയും ഉറ്റുനോക്കൽ.
