നിയമസഭാ തിരഞ്ഞെടുപ്പിലെ കോണ്ഗ്രസ് സ്ഥാനാര്ത്ഥി നിര്ണ്ണയവുമായി ബന്ധപ്പെട്ട നിര്ണ്ണായക ചര്ച്ചകള്ക്കായി പ്രതിപക്ഷ നേതാവ് വി.ഡി. സതീശനും സണ്ണി ജോസഫും ഇന്ന് ഡല്ഹിയിലേക്ക് തിരിക്കും. തിരഞ്ഞെടുപ്പ് അടുത്തിരിക്കെ, സ്ഥാനാര്ത്ഥി പട്ടികയ്ക്ക് അന്തിമരൂപം നല്കുന്നതിനുള്ള സ്ക്രീനിംഗ് കമ്മിറ്റി യോഗങ്ങളില് ഇരുവരും പങ്കെടുക്കും.
ഫെബ്രുവരി മാസത്തോടെ തന്നെ മുഴുവന് മണ്ഡലങ്ങളിലെയും സ്ഥാനാര്ത്ഥി നിര്ണ്ണയം പൂര്ത്തിയാക്കാനാണ് കോണ്ഗ്രസ് നേതൃത്വത്തിന്റെ തീരുമാനം. കെ.പി.സി.സി. തയ്യാറാക്കിയ പ്രാഥമിക പാനലുകള് സ്ക്രീനിംഗ് കമ്മിറ്റി വിശദമായി പരിശോധിക്കും. ഒന്നിലധികം പേരുകളുള്ള മണ്ഡലങ്ങളില് വിജയസാധ്യത മുന്നിര്ത്തി ഒറ്റപ്പേരിലേക്ക് ചുരുക്കുകയാണ് ഈ യോഗങ്ങളുടെ പ്രധാന ലക്ഷ്യം.
കെ.പി.സി.സി. പ്രസിഡന്റും സ്ക്രീനിംഗ് കമ്മിറ്റി ചെയര്മാനും ഡല്ഹിയിലെ ചര്ച്ചകളില് സജീവമായി പങ്കെടുക്കും. നിലവിലെ രാഷ്ട്രീയ സാഹചര്യങ്ങളും വിജയസാധ്യതയും വിലയിരുത്തി സ്ക്രീനിംഗ് കമ്മിറ്റി നല്കുന്ന റിപ്പോര്ട്ടിന്റെ അടിസ്ഥാനത്തിലാകും ഹൈക്കമാന്ഡ് അന്തിമ പട്ടിക പ്രഖ്യാപിക്കുക. യുവാക്കള്ക്കും വനിതകള്ക്കും പട്ടികയില് അര്ഹമായ പ്രാതിനിധ്യം ഉറപ്പാക്കണമെന്ന നിലപാടിലാണ് ഹൈക്കമാന്ഡ്.അടുത്ത ഏതാനും ദിവസങ്ങള്ക്കുള്ളില് തന്നെ ഡല്ഹിയില് വെച്ച് സ്ഥാനാര്ത്ഥികളുടെ കാര്യത്തില് ഔദ്യോഗികമായ ഏകദേശ ധാരണയാകുമെന്നാണ് പാര്ട്ടി കേന്ദ്രങ്ങള് നല്കുന്ന സൂചന.
