നടി അൻസിബ ഹസ്സൻ നൽകിയ പരാതിയിൽ താരസംഘടനയായ 'അമ്മ'യുടെ (AMMA) എക്സിക്യൂട്ടീവ് കമ്മിറ്റി അംഗവും നടിയുമായ ലക്ഷ്മിപ്രിയയുടെ മൊഴി പൊലീസ് ഇന്ന് രേഖപ്പെടുത്തും. മൊഴി നൽകാൻ നേരിട്ട് ഹാജരാകാൻ ആവശ്യപ്പെട്ട് തൃക്കാക്കര അസിസ്റ്റന്റ് കമ്മീഷണർ ലക്ഷ്മിപ്രിയയ്ക്ക് നോട്ടീസ് നൽകിയിട്ടുണ്ട്.
തനിക്കെതിരെ ലക്ഷ്മിപ്രിയ നൽകിയ പരാതി വ്യാജമാണെന്നും ഈ നീക്കത്തിന് പിന്നിൽ ഗൂഢാലോചന നടന്നിട്ടുണ്ടെന്നുമാണ് അൻസിബയുടെ പരാതിയിൽ പറയുന്നത്. കേസുമായി ബന്ധപ്പെട്ട് അൻസിബയുടെ മൊഴി ഇന്നലെ തൃക്കാക്കര എസ്പി ഓഫീസിൽ വെച്ച് പൊലീസ് രേഖപ്പെടുത്തിയിരുന്നു. ഇതിന് പിന്നാലെയാണ് ലക്ഷ്മിപ്രിയയുടെ മൊഴിയും ഇന്ന് രേഖപ്പെടുത്താൻ അന്വേഷണസംഘം തീരുമാനിച്ചത്.
ഇതിനുപുറമെ, തൃപ്പൂണിത്തുറ ഹിൽപാലസ് പൊലീസ് സ്റ്റേഷനിലെ വനിതാ സെൽ എസ്ഐക്കെതിരെയും അൻസിബ പരാതി നൽകിയിട്ടുണ്ട്. ഇവരുടെ മൊഴിയും ഇന്ന് രേഖപ്പെടുത്തിയേക്കുമെന്നാണ് ലഭിക്കുന്ന വിവരം. അൻസിബയ്ക്കെതിരെ നടൻ ടിനി ടോം മതപരമായ പരാമർശം നടത്തിയെന്ന ആരോപണം അടക്കമുള്ള താരസംഘടനയ്ക്കുള്ളിലെ ആഭ്യന്തര വിവാദങ്ങളും നിലവിൽ ചർച്ചാവിഷയമാണ്. ഈ വിഷയങ്ങളിൽ ഉൾപ്പെട്ടവരിൽ നിന്നും വരും ദിവസങ്ങളിൽ സംഘടന കൂടുതൽ വിശദീകരണം തേടിയേക്കും.
