കണ്ണൂർ എ.ഡി.എം ആയിരുന്ന നവീൻ ബാബുവിന്റെ മരണം സി.ബി.ഐ അന്വേഷണത്തിന് വിടാനുള്ള സംസ്ഥാന സർക്കാർ തീരുമാനത്തെ പൂർണ്ണമായി സ്വാഗതം ചെയ്യുന്നതായി ഭാര്യ മഞ്ജുഷ. സർക്കാരിന്റെ ഈ തീരുമാനം കുടുംബത്തിന് വളരെയധികം ആശ്വാസം നൽകുന്നതാണെന്നും മഞ്ജുഷ പത്തനംതിട്ടയിലെ വീട്ടിൽ മാധ്യമങ്ങളോട് സംസാരിക്കവെ വ്യക്തമാക്കി.
കഴിഞ്ഞ ദിവസം താൻ മുഖ്യമന്ത്രിയെയും ആഭ്യന്തര മന്ത്രിയെയും നേരിൽ കണ്ട് നിവേദനം നൽകിയിരുന്നു. അന്ന് വളരെ പോസിറ്റീവായ പ്രതികരണമാണ് അവരുടെ ഭാഗത്തുനിന്നുണ്ടായത്. എങ്കിലും ഇത്രയും പെട്ടെന്ന് സി.ബി.ഐ അന്വേഷണത്തിലേക്ക് കാര്യങ്ങൾ നീങ്ങുമെന്ന് പ്രതീക്ഷിച്ചിരുന്നില്ല.
ഈ അന്വേഷണത്തിലൂടെ സത്യം പുറത്തുവരുമെന്നും സി.ബി.ഐ അന്വേഷണം മികച്ച രീതിയിൽ മുന്നോട്ടുപോകുമെന്നാണ് പ്രതീക്ഷയെന്നും അവർ കൂട്ടിച്ചേർത്തു. നവീൻ ബാബുവിന്റെ മരണവുമായി ബന്ധപ്പെട്ട് ഉയർന്നുവന്ന ദുരൂഹതകളിൽ കൃത്യമായ അന്വേഷണം ആവശ്യപ്പെട്ട് കുടുംബം നേരത്തെ തന്നെ രംഗത്തെത്തിയിരുന്നു.
