ഇസ്രയേൽ-അമേരിക്കൻ സംയുക്ത ആക്രമണത്തിൽ ഇറാന്റെ പരമോന്നത നേതാവ് ആയത്തുള്ള അലി ഖമേനി (86) കൊല്ലപ്പെട്ടു. ശനിയാഴ്ച പുലർച്ചെ ടെഹ്‌റാനിലെ അദ്ദേഹത്തിന്റെ ഔദ്യോഗിക വസതിക്കു നേരെ ഉണ്ടായ മിസൈൽ ആക്രമണത്തിലാണ് അന്ത്യം സംഭവിച്ചത്. ഇറാൻ ഔദ്യോഗിക മാധ്യമങ്ങൾ വാർത്ത സ്ഥിരീകരിച്ചു. ഖമനെയിയുടെ മരണത്തിന് പിന്നാലെ അദ്ദേഹത്തിന്റെ മകൻ മോജ്തബ ഖമേനിയെ പുതിയ പരമോന്നത നേതാവായി പ്രഖ്യാപിച്ചു.
ഖമനെയിയുടെ മരണത്തെത്തുടർന്ന് ഇറാനിൽ 40 ദിവസത്തെ ഔദ്യോഗിക ദുഃഖാചരണം പ്രഖ്യാപിച്ചു. വരും ദിവസങ്ങളിൽ ഏഴ് ദിവസം രാജ്യത്ത് പൊതു അവധിയായിരിക്കും. തങ്ങളുടെ പ്രിയ നേതാവിന് ആദരാഞ്ജലികൾ അർപ്പിക്കാനായി ടെഹ്‌റാനിലേക്ക് ജനലക്ഷങ്ങളുടെ പ്രവാഹമാണ് നടന്നുകൊണ്ടിരിക്കുന്നത്.
ഖമനെയിയുടെ വസതിക്ക് പുറമെ ഇറാന്റെ പ്രധാന സൈനിക കേന്ദ്രങ്ങളിലും ആക്രമണം നടന്നു. വടക്കൻ ഇറാഖിലെ എർബിൽ അന്താരാഷ്ട്ര വിമാനത്താവളത്തിന് നേരെ ഡ്രോൺ ആക്രമണം ഉണ്ടായി. ഖത്തറിൽ നടന്ന മിസൈൽ ആക്രമണത്തിൽ 16 പേർക്ക് പരിക്കേറ്റു. ദുബായ്, അബുദാബി എന്നിവിടങ്ങളിലും സ്ഫോടന ശബ്ദങ്ങൾ കേട്ടതായി റിപ്പോർട്ടുകളുണ്ട്. മേഖലയിലെ സംഘർഷാവസ്ഥ കണക്കിലെടുത്ത് ഇതുവരെ 444 വിമാന സർവീസുകൾ റദ്ദാക്കി. എയർ ഇന്ത്യ, ഇൻഡിഗോ തുടങ്ങിയ പ്രമുഖ കമ്പനികൾ സർവീസുകൾ നിർത്തിവെച്ചിരിക്കുകയാണ്.
ഖമനെയിയുടെ മരണത്തിന് പിന്നാലെ ഇറാൻ നടത്തിയ മിസൈൽ ആക്രമണത്തിൽ ഒരു ഇസ്രയേൽ യുവതി കൊല്ലപ്പെട്ടു. ആക്രമണത്തിൽ 121 പേർക്ക് പരിക്കേറ്റതായും റിപ്പോർട്ടുകളുണ്ട്. ഇസ്രയേൽ നടത്തിയ ആക്രമണത്തിൽ ഇറാഖിലെ ഒരു സ്കൂൾ തകരുകയും 108 പിഞ്ചുകുട്ടികൾ ദാരുണമായി കൊല്ലപ്പെടുകയും ചെയ്തത് ലോകമനസാക്ഷിയെ ഞെട്ടിച്ചു.
ഖമനെയിയുടെ മരണം ഇറാന്റെ മോചനത്തിന്റെ തുടക്കമാണെന്ന് മുൻ ഇറാൻ രാജാവിന്റെ മകൻ ഷാ റെസ പഹ്ലവി പ്രതികരിച്ചു. ആക്രമണത്തിന് നേതൃത്വം നൽകിയതിന് അദ്ദേഹം ട്രംപിന് നന്ദി അറിയിച്ചു. അതേസമയം, ഷിയാ നേതാവ് മുഖ്താദ അൽ സദർ ഖമേനിയുടെ മരണത്തിൽ അനുശോചനം രേഖപ്പെടുത്തി.
നിലവിൽ പശ്ചിമേഷ്യൻ രാജ്യങ്ങൾ അതീവ ജാഗ്രതയിലാണ്. വ്യോമാതിർത്തികൾ പല രാജ്യങ്ങളും അടച്ചുകഴിഞ്ഞു. ഒരു പൂർണ്ണ യുദ്ധത്തിലേക്ക് കാര്യങ്ങൾ നീങ്ങുമോ എന്ന ആശങ്കയിലാണ് ലോകരാജ്യങ്ങൾ.
നിങ്ങൾ അറിയാൻ ആഗ്രഹിക്കുന്ന
വാർത്തകൾ നിങ്ങളുടെ കൈക്കുമ്പിളിൽ
