കേരളത്തിലെ പൊലീസ് സംവിധാനത്തിൽ സമഗ്രമായ മാറ്റങ്ങൾ വരുത്താൻ ഒരുങ്ങി ആഭ്യന്തര വകുപ്പ്. സംസ്ഥാനത്തെ പൊലീസ് സ്റ്റേഷനുകൾ ഇനി മുതൽ കൂടുതൽ ജനസൗഹൃദപരമായ ജനസേവന കേന്ദ്രങ്ങളാക്കി മാറ്റുമെന്ന് ആഭ്യന്തര മന്ത്രി രമേശ് ചെന്നിത്തല പ്രഖ്യാപിച്ചു. ഉന്നത പൊലീസ് ഉദ്യോഗസ്ഥരുമായി നടത്തിയ യോഗത്തിന് ശേഷമാണ് മന്ത്രി പുതിയ പരിഷ്കാരങ്ങൾ വ്യക്തമാക്കിയത്.
വിവിധ പൊലീസ് സ്റ്റേഷനുകളിലായി വർഷങ്ങളായി ഉപേക്ഷിക്കപ്പെട്ട നിലയിൽ കെട്ടിക്കിടക്കുന്ന ലക്ഷക്കണക്കിന് വാഹനങ്ങൾ പൊലീസ് ആക്ട് പ്രകാരം ഉടൻ തന്നെ നീക്കം ചെയ്യും. കൂടാതെ, സംസ്ഥാനത്ത് വർദ്ധിച്ചുവരുന്ന ലഹരി മാഫിയയുടെ പ്രവർത്തനങ്ങളെ അടിച്ചമർത്താനായി "ഓപ്പറേഷൻ തൂഫാൻ" എന്ന പേരിൽ പ്രത്യേക പദ്ധതി ഉടൻ തന്നെ ആരംഭിക്കുമെന്നും മന്ത്രി അറിയിച്ചു.
പരാതികളുമായി സ്റ്റേഷനുകളിൽ എത്തുന്നവരോട് മാന്യമായി പെരുമാറാനും അവരുടെ പരാതികൾ കൃത്യമായി കേൾക്കാനും ഉദ്യോഗസ്ഥർക്ക് കർശന നിർദ്ദേശം നൽകിയിട്ടുണ്ട്. ഇതിനൊപ്പം കുട്ടികൾക്കും സ്ത്രീകൾക്കുമെതിരെയുള്ള അതിക്രമങ്ങൾ തടയാൻ പ്രത്യേക നടപടികൾ സ്വീകരിക്കും. സൈബർ കുറ്റകൃത്യങ്ങൾ നേരിടാനുള്ള പ്രത്യേക പദ്ധതികൾ, റോഡപകടങ്ങൾ കുറയ്ക്കാനായി പുതിയ സാങ്കേതിക വിദ്യകളുടെ ഉപയോഗം, പൊലീസ് പരിശീലന സിലബസ് പരിഷ്കരിക്കൽ എന്നിവയും ആഭ്യന്തര വകുപ്പിന്റെ പുതിയ പദ്ധതികളിൽ ഉൾപ്പെടുന്നു.
പൊലീസ് സ്റ്റേഷനുകളിൽ എസ്.ഐ, സി.ഐ, ഡി.വൈ.എസ്.പി തസ്തികകളിൽ ആവശ്യമായ ഉദ്യോഗസ്ഥരെ നിയമിക്കുന്നത് സംബന്ധിച്ച് പഠിക്കാൻ ഒരു അഞ്ചംഗ സമിതിയെ നിയോഗിച്ചിട്ടുണ്ട്. ഈ സമിതിയുടെ റിപ്പോർട്ടിന്റെ അടിസ്ഥാനത്തിൽ ആവശ്യമായ തീരുമാനങ്ങൾ കൈക്കൊള്ളുമെന്നും ആഭ്യന്തര മന്ത്രി രമേശ് ചെന്നിത്തല വാർത്താസമ്മേളനത്തിൽ വ്യക്തമാക്കി.
