പ്രതിപക്ഷ നേതാവ് വി.ഡി. സതീശന്റെ ഗുരുവായൂർ ക്ഷേത്ര ദർശനവുമായി ബന്ധപ്പെട്ടുയർന്ന വിവാദങ്ങളിൽ വിശദീകരണവുമായി ഗുരുവായൂർ ദേവസ്വം ബോർഡ്. പ്രതിപക്ഷ നേതാവോ കൂടെയുണ്ടായിരുന്ന മറ്റുള്ളവരോ ക്ഷേത്രത്തിൽ നിയമലംഘനം നടത്തിയതായി തങ്ങൾക്ക് തോന്നിയിട്ടില്ലെന്ന് ദേവസ്വം ചെയർമാൻ എ.വി. ഗോപിനാഥ് വ്യക്തമാക്കി.
അവധി ദിവസങ്ങളിൽ വി.ഐ.പി ദർശനം പാടില്ലെന്നാണ് ഹൈക്കോടതിയുടെ കർശന ഉത്തരവ്. ഈ സാഹചര്യത്തിൽ പ്രതിപക്ഷ നേതാവിന്റെ സന്ദർശനം ചട്ടലംഘനമാണെന്ന ആരോപണങ്ങൾ ഉയർന്നിരുന്നു. എന്നാൽ സന്ദർശനത്തിനിടയിൽ സുരക്ഷാ ക്രമീകരണങ്ങളിലോ മറ്റോ എന്തെങ്കിലും തരത്തിലുള്ള വീഴ്ചകൾ ഉണ്ടായിട്ടുണ്ടോ എന്ന് ബോർഡ് പ്രത്യേകം അന്വേഷിക്കുമെന്ന് ചെയർമാൻ അറിയിച്ചു. സതീശന്റെ ദർശന സമയത്ത് സാധാരണക്കാരായ നിരവധി ഭക്തർക്ക് തൊഴാൻ സാധിച്ചില്ലെന്ന പരാതി ഉയർന്ന സാഹചര്യത്തിലാണ് ഈ അന്വേഷണം.
ഇതിനുപുറമെ, ക്ഷേത്രത്തിനുള്ളിൽ വച്ച് ചട്ടങ്ങൾ ലംഘിച്ച് സാമൂഹിക മാധ്യമങ്ങൾക്കായി റീൽസ് ചിത്രീകരണം നടത്തിയെന്ന ആരോപണത്തെക്കുറിച്ചും ദേവസ്വം ബോർഡ് അന്വേഷണം നടത്തും. വീഴ്ചകൾ സംഭവിച്ചിട്ടുണ്ടെങ്കിൽ കർശന നടപടികൾ സ്വീകരിക്കുമെന്നും ദേവസ്വം ചെയർമാൻ വിശദീകരിച്ചു.
