ബീഹാറിലെ നളന്ദ ജില്ലയിലുള്ള പ്രശസ്തമായ മാതാ ശീതള ക്ഷേത്രത്തിലുണ്ടായ തിക്കിലും തിരക്കിലും പെട്ട് എട്ടുപേർ മരിച്ചു. മരിച്ച എട്ടുപേരും സ്ത്രീകളാണെന്ന് അധികൃതർ സ്ഥിരീകരിച്ചു. ചൊവ്വാഴ്ച പുലർച്ചെ നടന്ന പ്രാർത്ഥനാ ചടങ്ങുകൾക്കിടെയാണ് ദാരുണമായ സംഭവം നടന്നത്.
ആദ്യം ഏഴ് മരണങ്ങളാണ് റിപ്പോർട്ട് ചെയ്തിരുന്നതെങ്കിലും പിന്നീട് ഒരാൾ കൂടി മരണപ്പെട്ടതോടെ ആകെ മരണസംഖ്യ എട്ടായി ഉയർന്നു. നിരവധി പേർക്ക് അപകടത്തിൽ പരിക്കേറ്റിട്ടുണ്ട്. ഇവരെ നളന്ദയിലെയും പരിസരത്തെയും വിവിധ ആശുപത്രികളിൽ പ്രവേശിപ്പിച്ചു. പരിക്കേറ്റവരിൽ ചിലരുടെ നില ഗുരുതരമായതിനാൽ മരണസംഖ്യ ഇനിയും ഉയർന്നേക്കാമെന്നാണ് റിപ്പോർട്ടുകൾ സൂചിപ്പിക്കുന്നത്.
എല്ലാ ചൊവ്വാഴ്ചകളിലും ആയിരക്കണക്കിന് ഭക്തർ എത്തുന്ന ക്ഷേത്രമാണിത്. തിരക്ക് നിയന്ത്രിക്കുന്നതിൽ ഉണ്ടായ വീഴ്ചയാണ് അപകടത്തിന് കാരണമായതെന്നാണ് പ്രാഥമിക നിഗമനം. ഭക്തർ വരി തെറ്റിച്ചതും പെട്ടെന്നുണ്ടായ പരിഭ്രാന്തിയും അപകടത്തിന്റെ ആക്കം കൂട്ടി. സംഭവത്തിൽ ബിഹാർ പൊലീസ് അന്വേഷണം ആരംഭിച്ചിട്ടുണ്ട്.
സംഭവത്തിൽ ബിഹാർ ഉപമുഖ്യമന്ത്രി സാമ്രാട്ട് ചൗധരി കടുത്ത ദുഃഖം രേഖപ്പെടുത്തി. പരിക്കേറ്റവർക്ക് മികച്ച ചികിത്സ ഉറപ്പാക്കാൻ അദ്ദേഹം ജില്ലാ ഭരണകൂടത്തിന് നിർദ്ദേശം നൽകി. ദുരന്തത്തിന് കാരണമായ സാഹചര്യങ്ങളെക്കുറിച്ച് വിശദമായ റിപ്പോർട്ട് സമർപ്പിക്കാനും അദ്ദേഹം ആവശ്യപ്പെട്ടിട്ടുണ്ട്.
ക്ഷേത്ര പരിസരത്ത് നിലവിൽ വൻ പൊലീസ് സന്നാഹത്തെ വിന്യസിച്ചിട്ടുണ്ട്. രക്ഷാപ്രവർത്തനങ്ങൾക്കായി കൂടുതൽ ആംബുലൻസുകൾ സ്ഥലത്തെത്തിച്ചിരുന്നു. ഭക്തരുടെ സുരക്ഷ ഉറപ്പാക്കുന്നതിൽ ക്ഷേത്ര കമ്മിറ്റിക്കും ഭരണകൂടത്തിനും ഉണ്ടായ വീഴ്ചയ്ക്കെതിരെ പ്രാദേശിക തലത്തിൽ പ്രതിഷേധം ഉയരുന്നുണ്ട്.
