ശബരിമല സ്വര്‍ണ്ണക്കവര്‍ച്ച കേസിലെ അന്വേഷണം ഊര്‍ജ്ജിതമാക്കുന്നതിന്റെ ഭാഗമായി പ്രതികളുടെ മൊബൈല്‍ ഫോണ്‍ വിവരങ്ങളും ടവര്‍ ലൊക്കേഷനുകളും അന്വേഷണ സംഘത്തിന് (SIT) കൈമാറാന്‍ മൊബൈല്‍ ഫോണ്‍ കമ്പനികള്‍ക്ക് ഹൈക്കോടതി കര്‍ശന നിര്‍ദ്ദേശം നല്‍കി. എസ്.ഐ.ടിയുടെ ആവശ്യപ്രകാരമാണ് കോടതിയുടെ ഈ നിര്‍ണ്ണായക ഇടപെടല്‍.
അടച്ചിട്ട കോടതി മുറിയില്‍ (In-camera proceedings) നടന്ന ഹര്‍ജി പരിഗണനയിലാണ് ജസ്റ്റിസ് ആന്റണി ഡൊമിനിക് അധ്യക്ഷനായ ബെഞ്ച് ഈ നിര്‍ദ്ദേശം നല്‍കിയത്. കേസിലെ പ്രതികളായ ഗോവര്‍ദ്ധന്‍, ഉണ്ണികൃഷ്ണന്‍ പോറ്റി, പങ്കജ് ഭണ്ഡാരി എന്നിവര്‍ ബെംഗളൂരുവിലെ ഒരു ഫ്ലാറ്റില്‍ വെച്ച് ഗൂഢാലോചന നടത്തിയെന്നും കേസ് അട്ടിമറിക്കാന്‍ ശ്രമിച്ചുവെന്നുമാണ് അന്വേഷണ സംഘത്തിന്റെ ആരോപണം.
മൊഴികളുടെ അടിസ്ഥാനത്തില്‍ പ്രതികള്‍ ഈ സ്ഥലങ്ങളില്‍ ഉണ്ടായിരുന്നുവെന്ന് ഉറപ്പുവരുത്താന്‍ ടവര്‍ ലൊക്കേഷന്‍ വിവരങ്ങളും കോള്‍ ഡിറ്റെയില്‍ റെക്കോര്‍ഡുകളും (CDR) അനിവാര്യമാണ്. എന്നാല്‍ ചില മൊബൈല്‍ കമ്പനികള്‍ ഈ വിവരങ്ങള്‍ കൈമാറാന്‍ തയ്യാറായിരുന്നില്ല. തുടര്‍ന്നാണ് കോടതിയുടെ ഇടപെടല്‍ ഉണ്ടായത്. കുറ്റകൃത്യം നടന്ന സമയത്തെ പ്രതികളുടെ സാന്നിധ്യവും അവര്‍ തമ്മിലുള്ള ആശയവിനിമയവും ഡിജിറ്റല്‍ തെളിവുകളിലൂടെ ഉറപ്പിക്കാന്‍ ഇതിലൂടെ സാധിക്കും.
അതേസമയം, ശബരിമല ശ്രീകോവിലിലെ സ്വര്‍ണ്ണപ്പാളികളില്‍ നിന്ന് ശേഖരിച്ച സാമ്പിളുകള്‍ ശാസ്ത്രീയ പരിശോധനയ്ക്കായി ഭോപ്പാലിലെ ലാബിലേക്ക് അയച്ചിട്ടുണ്ട്. ഇതിന്റെ പരിശോധനാ ഫലം കൂടി വരുന്നതോടെ കവര്‍ച്ചയുടെ വ്യാപ്തിയും രീതിയും സംബന്ധിച്ച് കൂടുതല്‍ വ്യക്തത ലഭിക്കുമെന്ന് എസ്.ഐ.ടി കോടതിയെ അറിയിച്ചു.
ശബരിമല കൊടിമരവുമായി ബന്ധപ്പെട്ട കേസിലെ അന്വേഷണ പുരോഗതിയും സംസ്ഥാന വിജിലന്‍സ് കോടതിയെ അറിയിച്ചിട്ടുണ്ട്. അന്വേഷണ സംഘം സമര്‍പ്പിച്ച ഇടക്കാല റിപ്പോര്ട്ട് പരിശോധിച്ച കോടതി, വിശദമായ ഉത്തരവ് പിന്നീട് പുറപ്പെടുവിക്കും.
