രാഹുൽ മാങ്കൂട്ടത്തിൽ എം.എൽ.എ. പ്രതിയായ ബലാത്സംഗക്കേസുകളിൽ ഇന്ന് നിർണായകമായ കോടതി വിധികൾ വരാനിരിക്കുന്നു. രാഹുലിനെതിരായ മൂന്നാം ബലാത്സംഗക്കേസിലെ ജാമ്യാപേക്ഷയിലാണ് പത്തനംതിട്ട സെഷൻസ് കോടതി ഇന്ന് വിധി പ്രസ്താവിക്കുന്നത്. ഇതിനുപുറമെ, ആദ്യത്തെ ബലാത്സംഗക്കേസിലെ മുൻകൂർ ജാമ്യാപേക്ഷ ഇന്ന് ഹൈക്കോടതിയും പരിഗണിക്കും.
നിലവിൽ മൂന്നാം കേസിൽ അറസ്റ്റിലായ രാഹുൽ മാങ്കൂട്ടത്തിൽ കഴിഞ്ഞ രണ്ടാഴ്ചയായി ജയിലിൽ കഴിയുകയാണ്. പുതിയ തെളിവുകളുടെ ആധികാരികത പരിശോധിക്കുന്നതിനായി കഴിഞ്ഞ ദിവസങ്ങളിൽ കോടതി വിധി പറയുന്നത് മാറ്റിവെച്ചിരുന്നു. ഡിജിറ്റൽ തെളിവുകളുടെ അഭാവം ജാമ്യം ലഭിക്കുന്നതിന് തടസ്സമായി നിൽക്കുന്നുവെന്നാണ് ലഭിക്കുന്ന വിവരം. പത്തനംതിട്ട സെഷൻസ് കോടതി ജാമ്യാപേക്ഷ തള്ളുകയാണെങ്കിൽ മൂന്നാം കേസിലും ഹൈക്കോടതിയെ സമീപിക്കാനാണ് പ്രതിഭാഗത്തിന്റെ തീരുമാനം.
അതേസമയം, രാഹുൽ മാങ്കൂട്ടത്തിൽ ലൈംഗിക വൈകൃതം കാണിക്കുന്ന വ്യക്തിയാണെന്നും, അദ്ദേഹം പുറത്തിറങ്ങിയാൽ അതിജീവിതമാരുടെ നഗ്നചിത്രങ്ങളും വീഡിയോകളും പ്രചരിപ്പിക്കാൻ സാധ്യതയുണ്ടെന്നും അതിജീവിത കോടതിയെ ബോധിപ്പിച്ചിട്ടുണ്ട്. ജാമ്യം അനുവദിക്കുന്നത് തങ്ങൾക്ക് വലിയ ഭീഷണിയാകുമെന്നും, കൂടുതൽ അതിജീവിതമാർ ഇനിയും പരാതികളുമായി രംഗത്തുവരാൻ സാധ്യതയുണ്ടെന്നും കോടതിക്ക് മുൻപാകെ സമർപ്പിച്ച വിവരങ്ങളിൽ പറയുന്നു.
കേസിൽ പ്രതിഭാഗവും പ്രോസിക്യൂഷനും ശക്തമായ വാദങ്ങളാണ് കോടതിയിൽ ഉന്നയിക്കുന്നത്. പത്തനംതിട്ട സെഷൻസ് കോടതിയിലേയും ഹൈക്കോടതിയിലേയും വിധികൾ എം.എൽ.എയുടെ ഭാവി തീരുമാനിക്കുന്നതിൽ പ്രധാനമാകും.
