നിയമസഭാ തിരഞ്ഞെടുപ്പിനായുള്ള സ്ഥാനാർത്ഥി നിർണയ ചർച്ചകളിലേക്ക് കോൺഗ്രസ് ഔദ്യോഗികമായി കടക്കുന്നു. സ്ഥാനാർത്ഥികളെ നിശ്ചയിക്കുന്നതിനുള്ള എഐസിസി സ്ക്രീനിങ് കമ്മിറ്റി ചെയർമാൻ മധുസൂദൻ മിസ്ത്രി ഇതിന്റെ ഭാഗമായി ഉടൻ കേരളത്തിലെത്തും. ഈ മാസം 13, 14 തീയതികളിൽ അദ്ദേഹം തിരുവനന്തപുരത്ത് എത്തുന്നതോടെ ചർച്ചകൾക്ക് വേഗതയേറും.
തിരഞ്ഞെടുപ്പിന് ഇനി മാസങ്ങൾ മാത്രം ബാക്കി നിൽക്കെ, സ്ഥാനാർത്ഥി നിർണയ നടപടികൾ എത്രയും വേഗം പൂർത്തിയാക്കാനാണ് കോൺഗ്രസ് നേതൃത്വത്തിന്റെ തീരുമാനം. മധുസൂദൻ മിസ്ത്രിയോടൊപ്പം തന്നെ എഐസിസി നിയോഗിച്ച പ്രത്യേക നിരീക്ഷകരും ഉടൻ കേരളത്തിൽ എത്തും. സ്ഥാനാർത്ഥി പട്ടിക തയ്യാറാക്കുന്നതിനായുള്ള പ്രാഥമിക സ്ക്രീനിങ് നടപടികൾ ഇവർ സംയുക്തമായി വിലയിരുത്തും.
ഈ മാസം തന്നെ സ്ഥാനാർത്ഥികളുടെ ആദ്യ പട്ടിക പുറത്തിറക്കാനാണ് കോൺഗ്രസ് നിലവിൽ ലക്ഷ്യമിടുന്നത്. സ്ക്രീനിങ് കമ്മിറ്റിയുടെ നേതൃത്വത്തിൽ നടക്കുന്ന വിശദമായ ചർച്ചകൾക്ക് ശേഷമാകും ആദ്യഘട്ട സ്ഥാനാർത്ഥികളെ പ്രഖ്യാപിക്കുക. തിരഞ്ഞെടുപ്പ് ഒരുക്കങ്ങൾ നേരത്തെ തന്നെ പൂർത്തിയാക്കി സജീവമായി രംഗത്തിറങ്ങാനാണ് ഹൈക്കമാൻഡ് സംസ്ഥാന ഘടകത്തിന് നിർദ്ദേശം നൽകിയിരിക്കുന്നത്.
