താമരശ്ശേരി ചുരത്തിലെ ദുരിതയാത്രയ്ക്ക് അറുതി വരുത്തുന്നതിനായുള്ള വയനാട് തുരങ്കപാത പദ്ധതി അതിവേഗം യാഥാർത്ഥ്യത്തിലേക്ക്. ആനക്കാംപൊയിൽ - കള്ളാടി - മേപ്പാടി തുരങ്കപാതയുടെ നിർമ്മാണ പ്രവർത്തനങ്ങൾക്കായി കേരള അടിസ്ഥാന സൗകര്യ വികസന നിധി (കിഫ്ബി) 2,134.5 കോടി രൂപയാണ് അനുവദിച്ചിരിക്കുന്നത്. പദ്ധതിയുടെ നിർമ്മാണോദ്ഘാടനത്തിന് പിന്നാലെ തുരങ്കത്തിനായുള്ള പാറ പൊട്ടിക്കൽ (Controlled Blasting) മാർച്ച് 6-ന് ആരംഭിച്ചു.
നിലവിൽ കോഴിക്കോട് നിന്ന് വയനാട്ടിലെത്താൻ താമരശ്ശേരി ചുരം വഴി 42 കിലോമീറ്റർ സഞ്ചരിക്കണം. എന്നാൽ പുതിയ തുരങ്കപാത വരുന്നതോടെ ഈ ദൂരം വെറും 20 കിലോമീറ്ററായി ചുരുങ്ങും. ഗതാഗതക്കുരുക്കിൽപ്പെടാതെ ഒന്നര മണിക്കൂറോളം യാത്രാസമയം ലാഭിക്കാൻ ഇത് സഹായിക്കും. മലബാറിലെ ചരക്ക് ഗതാഗതത്തിനും ടൂറിസം മേഖലയ്ക്കും ഈ പാത വലിയ കുതിപ്പേകും.
കൊങ്കൺ റെയിൽവേ കോർപ്പറേഷനാണ് (KRCL) പദ്ധതിയുടെ നോഡൽ ഏജൻസി. ആകെ 8.73 കിലോമീറ്റർ നീളമുള്ള പാതയിൽ 8.1 കിലോമീറ്ററും തുരങ്കത്തിലൂടെയാണ് കടന്നുപോകുന്നത്. നാല് വരി പാതയുള്ള ഇരട്ട തുരങ്കമാണ് ഇവിടെ നിർമ്മിക്കുന്നത്. ഇത് പൂർത്തിയാകുമ്പോൾ ഇന്ത്യയിലെ മൂന്നാമത്തെ വലിയ റോഡ് തുരങ്കവും കേരളത്തിലെ
ഏറ്റവും നീളം കൂടിയ തുരങ്കവുമായി ഇത് മാറും. അത്യാധുനിക വെന്റിലേഷൻ സംവിധാനം, ഫയർ പ്രൊട്ടക്ഷൻ, സിസിടിവി നിരീക്ഷണം എന്നിവ തുരങ്കത്തിനുള്ളിൽ ഉറപ്പാക്കും.
പരിസ്ഥിതി മന്ത്രാലയത്തിന്റെ കർശനമായ ഉപാധികളോടെയാണ് പദ്ധതിക്ക് അനുമതി ലഭിച്ചിരിക്കുന്നത്. പദ്ധതിക്കായി വിട്ടുനൽകുന്ന 17.2 ഹെക്ടർ വനഭൂമിക്ക് പകരമായി സംസ്ഥാനത്തിന്റെ വിവിധ ഭാഗങ്ങളിൽ ഇരട്ടി മരങ്ങൾ വെച്ചുപിടിപ്പിക്കും. വനത്തിനുള്ളിൽ ലേബർ ക്യാമ്പുകളോ നിർമ്മാണ അവശിഷ്ടങ്ങളോ അനുവദിക്കില്ല. പദ്ധതിക്കാവശ്യമായ സ്വകാര്യ ഭൂമിയുടെ 90 ശതമാനവും ഇതിനോടകം ഏറ്റെടുത്തു കഴിഞ്ഞു.
വയനാട് തുരങ്കപാത യാഥാർത്ഥ്യമാകുന്നതോടെ വയനാട് ജില്ലയുടെ കോഴിക്കോടുമായുള്ള ബന്ധം കൂടുതൽ സുഗമമാകും. വയനാട്ടുകാർക്ക് കോഴിക്കോട് മെഡിക്കൽ കോളേജ് ഉൾപ്പെടെയുള്ള ആരോഗ്യ കേന്ദ്രങ്ങളിൽ അതിവേഗം എത്തിച്ചേരാനാകും. മൈസൂരു, ബെംഗളൂരു തുടങ്ങിയ നഗരങ്ങളിലേക്കുള്ള വ്യാപാര ഇടപാടുകൾക്കും പുതിയ പാത കരുത്താകും. അടുത്ത നാല് വർഷത്തിനുള്ളിൽ നിർമ്മാണം പൂർത്തിയാക്കി 2030-ഓടെ പാത ഗതാഗതത്തിന് തുറന്നുകൊടുക്കാനാണ് സർക്കാർ ലക്ഷ്യമിടുന്നത്.
